Pagbagsak Ng Popularidad

arvin95's picture

PAGBAGSAK NG POPULARIDAD
Ni: Arvin U. de la Peña
 
Likas na sa pagkatao ni Wilson ang pagiging matulungin. Bata pa lang siya ay ganun na ang pagkatao niya. Matulungin sa pamilya at sa mga nakikita na tao na nahihirapan magdala ng kung ano. Ayaw na ayaw niyang nakakakita ng nahihirapan sa dinadala. Maging sa anumang uri ng pagtulong ay ginagawa niya. Kaya kilalang kilala siya sa kanilang lugar. Masipag pa siyang mag-aral.

Nang siya ay kumandidato bilang SK chairman sa kanilang barangay ay nanalo siya. Bagamat wala siyang pera para ibigay sa ibang mga botante na hindi niya masyadong kilala ay siya pa rin ang nanalo sa pakiusap ng mga magulang ng ibang botante na siya ang iboto. Hindi nagkamali ang mga bumoto sa kanya bilang SK chairman dahil naging maayos ang pamamalakad niya. Maraming events ang nangyari sa pamumuno niya para sa mga kabataan na hindi nagawa ng mga naunang SK chairman. Katulad ng basketball tournament, volleyball, chess, at kung ano pa na ikasasaya ng mga kabataan at paghubog na rin ng natatagong talento.

Pagkatapos ng kanyang termino bilang SK chairman ay nagpasya siyang tumakbo bilang konsehal sa kanilang barangay. Muli siya ay nanalo sa kabila na hindi man lang siya namili ng boto. Mahal talaga siya ng mga tao sa kanilang lugar. Sa loob ng tatlong termino ay maayos ang performance niya bilang konsehal.

Ganundin ng siya ay mahalal bilang Kapitan ng kanilang barangay. Sa loob ng siyam na tao ay tapat ang panunungkulan niya sa kanilang barangay. Lahat na problema at hinaing ay naaayos niya.

Dahil hindi na siya puwedeng tumakbo bilang kapitan sa kanilang barangay ay nagpasya siyang tumakbo bilang Vice Mayor. Doon ay tinulungan na siya ng ibang mga tao na nakakakilala sa kanya para sa kanyang pagtakbo bilang Vice Mayor. Pagkat mahihirapan siyang manalo kung hindi man lang magbigay ng kaunting pera para sa mga botante. Iyon ay dahil lungsod na ang pinag-uusapan. Hindi katulad ng sa barangay na masyado siyang kilala. Kahit hindi bumili ng mga boto ay iboboto pa rin siya. Marami ang tumulong sa kandidatura niya bilang Vice Mayor dahilan para siya ay manalo.

Bumilib ang mga tao sa kanilang lugar sa kanya bilang Vice Mayor. Naging idolo siya ng mga kabataan. Kaya pagkatapos ng tatlong taon na paninilbihan bilang Vice Mayor ay tumakbo siya bilang Mayor. Bago ang desisyon niya sa pagtakbo sa mataas na posisyon ay nakiusap pa sa kanya ang kasalukuyan na Mayor na kung puwede ay mag Vice Mayor na lang muna siya dahil last termna niya at tatakbo pa siya. Ngunit hindi iyon pinakinggan ni Wilson at tumakbo pa rin siya sa pagka Mayor. Sa kabila ng mabuting pamamalakad ng kinalaban niya pagka Mayor ay tinalo pa rin niya ito sa tulong na rin ng mga taong sumusuporta sa kanya.

Naging Mayor si Wilson sa kanilang lungsod. Sa unang termino niya bilang Mayor ay masyadong maganda ang kanyang mga nagawa para sa kanilang lungsod. Naging maunlad ang kanilang lungsod. Madaming proyekto ang nagawa na nakinabang ang taumbayan. Naging bukambibig ang pangalan niya sa kanilang lungsod maging sa malapit na lungsod. Kaya sa muli niyang pagtakbo bilang Mayor ay hindi siya nahirapan. Nanalo siya uli.

Ngunit sa pangalawang termino ni Wilson ay nag-iba na siya. Dahil kampante siya na mahal siya ng mga tao sa kanilang lungsod ay nagpagawa siya ng mga proyekto na overpriced talaga. Siya ang nasusunod sa lahat kahit tutol ang mga konsehal ng lungsod. Pinapangakuan ng malaking halaga ng pera ang mga konsehal para  pumayag sa mga proyekto. Sa mga proyekto na naaaprubahan ay milyon-milyon ang nagiging kita nila Wilson. Yumaman siya dahil sa mga overpriced na mga proyekto. Dahil mayaman na ay nag-iba na ang pakikitungo niya sa mga tao. Hindi na siya gaya ng dati na mahilig pumansin sa mga kababayan. Naging corrupt public official na siya.

At sa pangatlong pagtakbo ni Wilson bilang Mayor ay namili siya ng boto dahil alam niya na ayaw na sa kanya ng mga tao. Malakas din ang hatak sa taumbayan ang kalaban niya pagka Mayor dahil anak mayaman at kilala pang matulungin. Sa kabila na ilang milyon ang nagasto ni Wilson sa halalan siya ay natalo. Doon ay unti-unti ng bumagsak ang popularidad niya. Tumakbo siya ulit pagka Mayor sa sumunod na halalan pero talo pa rin siya.

Tumakbo din siya sa pagka Vice Mayor ng maghalalan uli at hindi pa rin siya nanalo. Kahit sa pagtakbo niya pagka Konsehal ng lungsod ay ganun pa rin ang kinalabasan. Talo pa rin siya. Ayaw na talaga ng mga botante sa kanya. Nagsisi siya sa nangyaring pagbagsak ng kanyang popularidad.

Bilang isang tao dapat nating tanggapin kung ilang pera lang ang dumating sa atin. Maliit man na suweldo o kita ay pagyamanin. Tanggapin natin na iyon lang talaga ang para sa atin. Ang paghangad ng malaki na suweldo o kita ay hindi naman masama basta hindi nakakasakit sa kapwa.
 

my blog http://www.arvin95.blogspot.com